Iniziativis gnovis Telâr 2009-2014
Iniziativis stadis Progjets
Tribune Documents
CAPITOLÂT CIVIC REGJONÂL  /  CAPITOLÂT CIVIC COMUNÂL

CAPITOLÂT CIVIC STATÂL
MOVIMENT CIVIC CULTURÂL ALPIN-ADRIATIC "FOGOLÂR CIVIC"
CIRCUL UNIVERSITARI FURLAN "ACADEMIE DAL FRIÛL"
Presidence: Via Ciconi 18 – 33100 Udin
Friûl Vignesie Julie – Italie – Europe
e-mail: aquileianova@libero.it


Presentazion

Bepi, Giuseppe Menossi, furlan onest di chei di une volte, colaborant ancjemò che si vailu, dai prins timps dal nestri moviment, i varès tignût di fâ fâ une imagjin dai sants Macôr e Fortunât, martars di Aquilee primarûi, patrons cristians dal Friûl e di dute la Mittel-Europe, di metile fûr intun puest di passaç indulà che e podès spampanâ benon il lôr mes di fradaie fra la int. Une figurazion antighe dai doi, sul soiâr di chest nestri barcon eletronic culì, viert su dut il mont, e je a palesâ trop che o sin di chê idee e trop che il Moviment Civic Culturâl Alpin-Adriatic "Fogolâr Civic" e il Circul Universitari Furlan "Academie dal Friûl" che a son cumò i tegnin di onorâ cussì la memorie di un piçul grant dal nestri popul...

Presentazion

Comunitât di int di tantis bandis di plui continents, puint jenfri la Europe e il Mediterani, tra Tramontane e Misdì, framieç di Jevât e Bonât, Aquilee, metropul antighe alpine-adriatiche, in dì di vuê Friûl Vignesie Julie, Nordest dut speciâl dal Nordest de Italie, cetantis voltis e à vût mostrât une grande union tai siei citadins e un savê fâ front che e je stade buine parfin di vincile cuintri de trupe imperiâl romane.

Aquilee, cûr di un patriarcjât religjôs e civîl internazionâl juste gradonon, e je stade propit la prime scune de civiltât mittel-europeane.

Di chel patriarcjât, dopo, la citât furlane di Udin e je stade fie e ultime capitâl, bastion storic di popul cuintri di invasôrs e siorats dal puest.

Inalore, di chê citât e partìs "dal bas" une iniziative di moviment culturâl cul intent di rignuvî in scjale, di chel che si pues, il spirt di comunitât des gjernaziis sûrs metudis adun de Mari Aquilee, sburtant a la largje ancje une rinassince de culture civiche europeane e globâl.

Il non di AQVILEIA NOVA, cjapât sù di cheste vetrine eletroniche dal Moviment Civic Culturâl Alpin-Adriatic "Fogolâr Civic" e dal Circul Universitari Furlan "Academie dal Friûl", al vûl sei rivoc di un titul antîc des diviersis bandis che par un sant o ben par chel altri, dilunc dai secui, si son fatis passâ di eredis de famose "civitas" de Europe mezane che i disevin "Seconde Rome".

Chel rivoc li si tornilu vuê a tirâ fûr e si presentilu tant che un avôt di rignuviment e rimodernament di principis bogns di umanitât e di comunitât cun lidrîs ben insot.

La ilustrazion metute sul font di cheste vetrine mighe no di bant no ripuarte une piçule "risultive di aghe vive", di li dal lît dongje di Aquilee, che juste di chê, come idee, e sarès spissulade fûr la civiltât mittel-europeane: li al è sbarcjât Marc evangjelist cun di fat, mes di sperance e fonde culturâl di union des gjernaziis jenfri Adriatic e Donau. Par noaltris dal Moviment Civic Culturâl Alpin-Adriatic "Fogolâr Civic" e dal Circul Universitari Furlan "Academie dal Friûl" chê risultive e je, come culture, patrimoni sacrât e clamade continue a une mission storiche "aquileiese" su tancj aspiets, dome di rionzile.

Ve che si pandiur il nestri agrât in ultin a puar Gilberto Pressacco, il studiôs, tant che a puar Ermes Silvano Candido, so e nestri colaborant, che nus àn instradâts a capî la impuartance fûr dal ordenari di chel puest alì...

Ideis e scrits: prof. Alberto Travain
Supuart pes lenghis: prof. David Bizjak
Si dîs graciis a un cjâr amì pal implant informatic
An 2012-2013