MOVIMENT CIVIC CULTURÂL ALPIN-ADRIATIC "FOGOLÂR CIVIC"
CIRCUL UNIVERSITARI FURLAN "ACADEMIE DAL FRIÛL"
Presidence: Via Ciconi 18 – 33100 Udin
Friûl Vignesie Julie – Italie – Europe
e-mail: aquileianova [@] libero [.] it


Liendis

Partignî a un teritori e vê vôs in cjapitul come citadins: la regjon in forme ideâl di une statue e la cjampane dal popul, su la place grande di Udin, capitâl furlane erede de storiche metropul internazionâl alpine-adriatiche di Aquilee, almancul par nô dal Moviment Civic Culturâl Alpin-Adriatic "Fogolâr Civic" e dal Circul Universitari Furlan "Academie dal Friûl", a son pursì a mostrâ dôs musis inseparabilis di une "rinassince" de comunitât intindude tant che bastion locâl e globâl di int in armonie. Distès, chei simbui, tal cûr di Udin, po dopo al pâr ancje che a rivochin contrascj indaûr di chei pençs e il destin di une tiere che tantis voltis, dilunc de sô storie, si è cjatade cjamp di bataie, confin e ben farie che e à lavorât e incrosât civiltâts in fat di politiche, societât tant che di principis...

liendis

Al è partît dut cuant di une piçule citât de Europe cul non in cinc lenghis: Utinum, Udin, Udine, Videm, Weiden, par latin, furlan, talian, sloven e todesc.

Al è partît dut propit di Udin, democratiche "Atene dal Friûl", "ultime Aquilee" erede de prime grande metropul mittel-europeane, ricet e ripâr di cetante int, che une volte si devin dongje alì il parlament salacor plui antîc e l'unic cuintri-parlament di popul di dute la Europe e po dopo assembleis di citadins fuartis, tant di citât che robe di paîs.

Tal 1989 o jerin un PROGRAM PAR RADIO che al veve di titul "La Cjampane dal Arengo" vâl a dî il non popolâr furlan de cjampane civiche di Udin, simbul di grandis tradizions dal puest come comunitât e democrazie direte. Ve che za in chê volte si veve il claut di dâ une man a dismovi il spirt civic.

Tal 1991 o jerin un PARLAMENT DE INT cuntun non in trê lenghis ven a stâi par furlan, sloven e todesc, che i disevin "Parlament de Patrie dal Friûl / Skupščina Furlanske Domovine / Parlament des Heimatlandes Friaul". Si veve chê di judâ a meti adun il spirt civic de une regjon alpine-adriatiche riviodint ancje tradizions di rapresentance de comunitât dal Stât di Aquilee chel antîc, a cavalot di cetantis nazions.

Dal 1994 o sin un CIRCUL DI UNIVERSITÂT che al à non, in lenghe furlane, "Academie dal Friûl", rivoc lontan de famose farie di pinsîr de antighe civiltât greghe des "poleis" vâl a dî la scuele tant innomenadone implantade sù intun suburbi di Atene dal filosofari Platon. L’intent al è chel di judâ a incuadrâ e rionzi il spirt civic partint ben des scuelis e des universitâts dal puest.

Dal 2000 o sin un MOVIMENT DI POPUL batiât par furlan cul non di "Fogolâr Civic", base ideâl di un stâ dongje e dâsi une man un cul altri fra citadins ancje pûr diferents e custodie gjelose des lôr memoriis e des lôr gloriis di comunitât. Nô o varessin gole di dâ une man a rionzi il spirt civic partint, prin di dut, de societât e dal teritori furlans e mittel-europeans tant a dî cjapant mani dal sium di un Friûl e di une Mittel-Europe "dal Citadin"...