MOVIMENT CIVIC CULTURÂL ALPIN-ADRIATIC "FOGOLÂR CIVIC"
CIRCUL UNIVERSITARI FURLAN "ACADEMIE DAL FRIÛL"
Presidence: Via Ciconi 18 – 33100 Udin
Friûl Vignesie Julie – Italie – Europe
e-mail: aquileianova [@] libero [.] it


Partencis

Aquilee, primarole metropul de Mittel-Europe, in forme di statue, e je che e domine, dal alt dal palaç dal Comun, la citât di Udin, che in Friûl Vignesie Julie e à vût simpri cirût di someâi. Al pâr juste che e tegni di voli, cun critiche, citadins tant dispès straviâts e dismenteâts de funzion particolâr di farie di comunitât che gjeografie e storie ur àn destinât su la crosere de Europe latine, sclave e gjermaniche. Vê iniment e ancje ben rionzi, ce che si pues, chê funzion alì al è il nestri fin ultin e continuât, come Moviment Civic Culturâl Alpin-Adriatic "Fogolâr Civic" e Circul Universitari Furlan "Academie dal Friûl"...

partencis

Tratant di tirâ aghe al mulin di dute cuante la UMANITÂT cul sburtâ, midiant de culture, une rinassince de COMUNITÂT dal locâl al globâl soflade "dal bas", come esperiment noaltris o partìn di dulà che o sin, vâl a dî de scune storiche furlane de misclice e complicade regjon dal Friûl Vignesie Julie che e je cumò, "piçul ristret dal marimont" tal Nordest de Italie, crosere naturâl e umane de gjeografie, bande plui insù indulà che la Europe si lave tal Mediterani, liende di curizûl di culturis e popui rimandade e intitulade a un so antîc e famôs governant: chel Iulius Caesar, che pe tradizion al sarès ancje pari de lenghe dal puest tant che struc ideâl di nazions diferentis.

Chestis nestris bandis a son simpri stadis tieris di scuintri e di incuintri, puescj par fâ pratiche dal vivi in armonie, testemoniis di storiis particolârs sul fâ comunitât, vê vôs in cjapitul e movi la int.

Chestis nestris bandis a son stadis la prime lûs de civiltât mittel-europeane, puint fra nazions, che la sô grande metropul chê primarole, Aquilee antighe, miscliç di popui, e jere culì e compagn la sô prime universitât a cavalot dai confins che, te Medietât tarde, e jere a Cividât.

Cjapant mani di chê civiltât nô in particolâr o batìn di rionzi une culture civiche no dome chê dal rispiet usuâl pes autoritâts ma ancje dal ribalton cuintri des prepotencis daûr dal spieli di une liende dal restâ salts, dal sei di principis, dal no pleâsi, de int di Aquilee, che par latin si disevii "rusticitas", par grêc "haplotes" e par furlan ancjemò si fevele di "salt, onest, lavoradôr". Une liende che si è produsude in mil mûts te storie des nestris tieris e che nô si cirile pardut in dutis lis localitâts dal teritori partint de citât nestri prin ridot: Udin, centrâl storiche dal Friûl, capitâl ultime e bastion civic de comunitât mittel-europeane chê primarole, vâl a dî il patriarcjât alpin-adriatic aquileiês.

De Mari Aquilee chescj nestris intents a cjapin ben sù ancje i colôrs de tradizion, celest e aur/zâl (compagns, par altri, di chei de Europe Unide di vuê e, a la lontane, rivoc di confronts Ocident-Orient o Nord-Sud a plasê), dâts dongje dal blanc de "toga virilis" storiche romane, simbul classic universâl dal Citadin, che si forme cussì un tricolôr civic gnûf, locâl e globâl dut intun, che al clame la int a sintîsi fradis e insiemi sovrans di ogni misure di comunitât...