MOVIMENT CIVIC CULTURÂL ALPIN-ADRIATIC "FOGOLÂR CIVIC"
CIRCUL UNIVERSITARI FURLAN "ACADEMIE DAL FRIÛL"
Presidence: Via Ciconi 18 – 33100 Udin
Friûl Vignesie Julie – Italie – Europe
e-mail: aquileianova [@] libero [.] it


Jenfri Scuele & Universitât

A Udin lis stemis dal Patriarcjât di Aquilee e dal Ream di Boemie che a son ancjemò, robe dal Tresinte, a ricuardin i timps che il Friûl al à vude, ancje se par pôc, la prime universitât a servizi dai popui de Mittel-Europe ven a stâi Mucs, Ongjars, Sclâfs e Latins. Un Friûl che il so popul, vie pal Nûfcent, i à tornât a cuistâ, câs particolâr, il dirit a vê une univesitât sô. Si che duncje rionzi tradizions viertis di comunitât e di vôs in cjapitul dabon des primis Universitâts, fariis e scuelis di identitât, di armonie e sens dal Citadin, di lâ a presentâures in vuê di gnûf ai students di ogni stât e grât, al è intindiment dai plui salts dai nestris Moviment Civic Culturâl Alpin-Adriatic "Fogolâr Civic" e Circul Universitari Furlan "Academie dal Friûl"...

jenfri scuele & universitât

Midiant de culture, nô o vin tradizion di puartâ indevant te UNIVERSITÂT une rinassince "dal bas" di un spirt di COMUNITÂT disponibile, libare e parone, cun chê, plui di dut:

1) di tirâ sù un sens di sei part ative dentri te "UNIVERSITAS" ven a stâi la comunitât universitarie, miscliç simpri stât di int di tantis bandis che al pues jessi farie ancje di armonie des mil diferencis che a son tal mont;

2) di cressi un leam culturâl e civic cuntune "NATIO" vâl a dî la comunitât origjinarie, in buinis cun dutis lis identitâts che a son dentri intune universitât.

Chest si fasilu soredut cun iniziativis che a tratin:

1) di rimodernâ tradizions antighis di vôs in cjapitul, in particolâr dai students, tal guvier des universitâts;

2) di tornâ a tirâ fûr cemût che une volte si devin dongje e si dividevin tes comunitâts universitariis, daûr de materie, de tiere di origjin o ben de culture tant che de covade, batint il troi di tradizions vieris di universitât talianis e mittel-europeanis.

Noaltris si cîr di tirâ sù alore chel antîc dopli sintîsi a part des comunitâts di studi e di origjin mighe no dome te Universitât ma ancje prin tes SCUELIS, sburtant par solit i students a metisi in clape par fâ alc di bon, ancje ben un doman, a pro de culture e de societât, simpri cuntun sens di comunitât e chê di dâ une man.

Un tant si fasilu partint de complicade regjon forojuliane (Friûl Vignesie Julie / Friuli Venezia Giulia / Furlanija Julijska Krajina / Friaul Julisch Venetien), crosere de Europe Unide dilunc dal confin di une volte fra Austrie, Italie e Slovenie e sigûr cûr antîc ancje universitari di dute la bande alpine-adriatiche che li e je stade dabon la prime universitât a cavalot dai confins de Mittel-Europe ("in metis Alemannie Ungarie Sclavonie atque Italie"), metude sù juste te Ete di Mieç a Cividât, la capitâl civîl primarole dal storic Patriarcjât di Aquilee, e ricognossude in forme uficiâl dal regnant Carli di Lussemburc-Boemie tal 1353...