MOVIMENT CIVIC CULTURÂL ALPIN-ADRIATIC "FOGOLÂR CIVIC"
CIRCUL UNIVERSITARI FURLAN "ACADEMIE DAL FRIÛL"
Presidence: Via Ciconi 18 – 33100 Udin
Friûl Vignesie Julie – Italie – Europe
e-mail: aquileianova [@] libero [.] it


Viodudis

"Te union e sta la fuarce": un riclam al valôr de comunitât tant che ben di ducj e ognidun al domine dal alt dal palaç dal Comun di Udin, citât dal Friûl Vignesie Julie, erede de metropul alpine-adriatiche storiche di Aquilee che lis sôs famosis union e saldece a àn fat maraveâ dut il mont dal Antîc. Ve che alore in chel sproc latin "vis unita fortior" nô dal Moviment Civic Culturâl Alpin-Adriatic "Fogolâr Civic" e dal Circul Universitari Furlan "Academie dal Friûl" o podìn ben viodi segnât il fin ultin dal nestri agjî sociâl-culturâl a pro di un spirt civic di judâsi un cul altri e no tirâsi indaûr...

viodudis

Nô o calcolìn la COMUNITÂT tant che une dibisugne de UMANITÂT di difese e di afiet, par vie che la int e pues cjatâ dentri ricet e ripâr.

Cuant che la comunitât si sfante, la Umanitât si divît restant in balie dai plui fuarts.

Inalore, comunitât al vûl dî judâsi un cul altri e sperance di une sigurece di libertât e di dignitât par ducj e ognidun.

Cul condurâ des migrazions te storie e cu lis diferencis che a'nd è simpri plui, tant come principis che come costums, al sarès pardut di stâ saldo daûr a cirî di tornâ a regolâ o implantâ lis comunitâts indulà che a son.

Cence nuie in comun no je comunitât e cence nuie in comun di principis la comunitât no à principis di union e nancje no funzione pal ben de sô int.

Cun devant vierziduris dal gjenar e partint di dulà che o sin, nô o varessin gust di rivâ a tirâ la aghe al mulin di dute la Umanitât propit cul sburtâ, midiant de culture, une rinassince de comunitât tirade sù "dal bas", dal locâl al globâl, tal rispiet virtuôs e simpri armoniôs des diferencis, lant ancje in cercje di une identitât culturâl e civiche che e meti adun ator di bogns principis, gjavade fûr e ispirade di un TERITORI calcolât sui fats, di une bande, di spazi e contignidôr di int e, di chê altre, di civiltât o ben di contignût di esperience storiche umane logade intun puest specific, di seguîle e judâle a lâ in miôr in sens umanistic.

Partant, prin di dut, nô i tignìn di pocâ la int sul metisi adun, sul vê vôs in cjapitul e sul tramandâ la culture e o sperìn in comunitâts che a sedin virtuosis, simpri cul rispiet dai principis plui sacrosants dal Om e in armonie sui diviers scjalins, di chel locâl fintremai chel globâl; comunitâts cuntune cussience di sei cuarp sovran di nature, prontis a tirâ dentri, pal pont sociâl, culturâl e civîl, cualsisei; congreghis variadis e unidis, leadis e disponibilis, seneosis di libertât e di contâ tes decisions.

O sin convints, in finâl, che si vedi di regolâ in forme rimodernade une culture laiche in stât di dâ dongje la int aurint ancje des risultivis di bogns principis valevui pardut che si cjatin dentri tes filosofiis e tes religjons insedadis te storie di ogni comunitât specifiche...